ᐦᐋᕇ ᓯᐱᔫ ᐋ ᒌ ᑎᐹᒋᒧᑦ
ᐱᕌᔨᓐ ᐌᑉ ᐊ ᒌ ᐃᑣᔥᑎᒫᑎᐦᒃ ᑭᔮ ᐋ ᒌ ᒥᓯᓂᐦᐊᐦᒃ

ᐹᔨᒀᐤ ᑮᑆ ᓂᒌ ᐱᔥᐱᓈᐙᒋᐦᐄᑯᓐ ᑭᔮ ᓃᔨ ᐅᑖ ᐐᓂᐹᑯᐦᒡ ᐅᑖ᙮ ᓂᒌ ᑣᔑᓐ, ᓂᒌ ᐱᑭᔥᑎᐙᐱᔨᓐ ᐊᓂᑖ ᑖᔅᑯᒻ ᐊᓂᑖ ᑳ ᐱᑭᔥᑎᐙᐱᔨᔮᓐ ᐋ ᑎᒀᒋᐦᒡ᙮
ᐋ ᔒᐹᐙᔮᒡ ᐊᓂᑖ ᒥᓂᔥᑎᒄ, ᐋ ᔒᐹᐙᔮᒡ, ᒀᐦᑎᒃ ᐙᔥ ᐊᓐ ᐋᐦᒋᒄ ᐅᔥᑭᒡ ᐋ ᐊᑎ ᒥᔥᑯᐎᑎᐦᒡ ᐊᓂᑖ ᐋ ᓂᐲᐅᒡ ᐊᓂᑖ ᐋ ᔒᐹᐙᔮᒡ, ᐋᑯᑦ ᒫᒃ ᐊᓂᑦ ᓂᔮᓂᑯᑐᓐᐦ ᐎᔮᐱᒫᑭᓂᐎᑦ ᒫᓐᐦ ᐋᐦᒋᒄ ᐋ ᐅᐦᒋ ᓅᑯᓯᑦ᙮ ᐋᐅᒄ ᒫᒃ ᐊᓐ ᐋ ᐃᐦᑎᔮᐦᒡ ᐋ ᐱᒥᐱᔨᔮᐦᒡ᙮ ᐎᔮᐱᒥᒋᐦᑦ ᐋᐦᒋᒄ ᐙᐦᒋ ᓅᑯᓯᑦ ᐊᓂᑖ ᐋ ᔒᐹᐙᔮᔨᒡ᙮ ᐊᓂᑖ ᐋ ᐊᑎ ᐃᑐᐦᑖᔮᐦᒡ᙮ ᐋ ᐊᑎ ᐃᐱᔮᐦᒡ ᐊᓂᑖ᙮ ᒑᒃ ᒫᒃ ᐊᓂᑖ ᐙᐦᒋ ᓅᑯᓯᑦ᙮ ᐱᔮᔅᒋᐦᐅᒄ᙮
ᐅᔮ ᑳ ᐹᒋᐦᐅᒄ ᐅᔮ, ᐅᑖ ᑳ ᐊᐱᒡ ᓂᑖᒥᓈᓂᒡ᙮ ᓈᑖ ᑳ ᐃᐦᑖᑦ ᐊᐙᓐ ᐆᑎᐦᒡ᙮ ᐹᔓᒡ ᓄᐎᒡ ᐅᑖ ᒌ ᐃᐦᑖᐤ ᐊᐙᓐ᙮ ᒫᐅᔮ ᐋ ᐃᓯᓈᑯᓯᑦ ᐙᔥ ᒥᔅᑯᒦ, ᒧᔮᒻ ᐅᔮᑭᓂᐦᒡ ᐋ ᐃᓯᓈᑯᓯᑦ᙮ ᒫᐤ ᓈᓂᑑ ᐃᔮᔅᑎᔮᒋᒑ᙮ ᒧᔮᒻ ᐅᔮᑭᓂᐦᒡ ᐋ ᐃᓯᓈᑯᓯᑦ᙮ ᐅᑖ, ᓈᔥᑏᒡ ᓂᒥ ᒥᔥᑭᐎᑎᓐ, ᐄᑎᐤ, ᐙᔅᑳ ᒥᔅᑯᒦ ᐋ ᐃᐦᑖᑦ᙮ ᓂᒥ ᑖᐦᒋᔑᓐ ᑭᔮ ᐅᑎᐦ᙮ ᒦᓐ ᐅᑖ ᒥᔅᑯᒦ ᐋ ᐊᑯᒋᐦᒃ᙮
ᐋᐅᒄ ᒫᒃ ᐆ, ᓂᒥ ᓈᔥᒡ ᓂᒋᔅᒑᔨᐦᑖᓐ ᐋ ᐋᐦᒋᑳᐳᐎᔮᓐ ᐊᓐ᙮ ᒥᔔ ᒧᔑᐦᑖᔮᓐ ᐋ ᐱᒋᔑᓂᔮᓐ, ᓈᔥᑏᒡ ᑏᐙᐦᒡ ᓂᔅᑳᑦᐦ ᐱᒋᔅᑎᓐᐦ ᐅᑖ᙮ ᒥᒄ ᑳ ᑎᐦᑯᓂᒫᓐ ᐅᑖ ᓂᐱᑖ ᓂᐹᔅᒋᑭᓐ᙮ ᐆ ᒦᓐ ᐱᔻᐱᔅᒄ ᓂᐱᑖ ᑳ ᑎᐦᑯᓂᒫᓐ᙮ ᐆ ᓂᐹᔅᒋᑭᓐ ᐄᑖᐦᒑ ᐋ ᒌ ᑎᐦᑯᓂᒫᓐ, ᑮᑆ ᐅᑖ ᓂᐲᐦᒡ ᐋᑯᑖ ᐋ ᐃᐦᑎᑯᐦᒡ ᐊᓂᔮ᙮ ᐆ ᐱᔻᐱᔅᒄ ᑳ ᑎᐦᑯᓂᒫᓐ, ᐋᑯᑖ ᒥᔅᑯᒦᐦᒡ ᐋ ᐃᐦᑎᑯᐦᒡ᙮ ᓂᒥ ᓂᒌ ᐋᐦᒋᔨᓐ ᓈᔥᑏᒡ᙮ ᓂᒥ ᓂᒌ ᐃᐦᑐᑖᓐ ᑭᔮ ᐆ ᒑ ᒌ ᐃᔅᐱᔨᐦᑖᔮᓐ ᐆ ᓂᔅᐱᑐᓐ᙮ ᒥᒄ ᑖᐦᑯᓂᒫᓐ ᐅᑖ ᐄᑖᒥᐹᑯᐦᒡ ᐆ ᓂᐹᔅᒋᑭᓐ᙮ ᒫᐤ ᐋ ᐃᔥᐱᔑ ᓅᑯᓯᔮᓐ᙮
ᐱᔮᒋ ᒋᒋᓂᑦ ᐊᓐ ᐹᔓᒡ ᐊᓂᑖ ᑳ ᐃᐦᑖᑦ᙮ ᐐᐱᒡ ᑮᑆ ᐱᔮᒋ ᐅᑎᐦᒋᐱᔑᑦ᙮ ᐱᔮᒋ ᐅᒋᐱᔑᑦ ᐊᓂᑖ᙮ ᐋᐅᒄ ᑳ ᐱᐹᔥᐱᓈᐙᒋᐦᐅᔮᓐ ᐊᓂᑖ ᐐᓂᐹᑯᐦᒡ ᓃᔨ᙮ ᓂᒥᔮᐤ ᐊᓐ ᐐ ᐋ ᐙᐹᐦᐅᑯᓈᓂᐎᒡ᙮ ᒥᒄ ᐃᐦᐱᓂᒡ ᐊᓂᑦ ᐆ ᐋ ᒌ ᐃᓯᓈᑯᓯᑦ ᐊᓐ ᒥᔅᑯᒦ᙮ ᐅᔮ ᒫᒃ ᐋᑳ ᐊᑎ ᑎᒀᔥᒀᔑᐦᒃ ᐅᔮ, ᐋᑯᑦ ᑳ ᐱᑭᔥᑎᐙᐱᔨᔮᓐ᙮ ᐋᐅᒄ ᑳ ᐃᐦᑎᔮᓐ ᐹᔨᒀᐤ ᐋ ᒌ ᐱᔥᐱᓈᐙᒋᐦᐄᑯᔮᓐ ᐊᓂᑖ ᓂᐲᐦᒡ᙮
ᓂᒧᔨ ᑮᑆ ᓂᐅᐦᒋ ᓵᒑᔨᐦᑖᓐ ᐊᓐ᙮ ᐙᔥ ᐊᓐ ᑳ ᐃᑎᑰᔮᓐ, ᐋᑳ ᐅᐦᒋ ᓂᑐᐙᔨᐦᑖᑯᓯᑦ ᐊᐙᓐ ᒑ ᓵᒑᔨᐦᑎᐦᒃ ᐊᓂᑖ ᒑᒀᔨᐤ ᐋ ᐹᔥᐱᓈᐙᒋᐦᐄᑯᑦ᙮ ᓂᒥ ᓂᑐᐙᔨᐦᑖᑯᓯᐤ ᓈᔥᒡ ᓈᐅᔥ ᒑ ᓵᒑᔨᐦᑎᐦᒃ ᓂᒌ ᐃᑎᑰᓐ᙮ ᐋᐅᒄ ᑳ ᐃᐦᑎᔮᓐ ᒫᒃ ᐊᓐ᙮ ᐊᔮᐱᒡ ᐅᑖ ᓂᒌ ᐄᔑ ᒋᐦᒋᐱᔨᓈᓐ᙮ ᒫᓂᑖ ᐙᔥ ᑳ ᒥᐦᒋᑖᐙᔮᒡ ᑳ ᐐᐦ ᐃᔅᐱᔨᔮᐦᒡ᙮ ᐊᔮᐱᒡ ᐊᓂᑖ ᓂᒌ ᐄᔑ ᒋᐦᒋᐱᔨᓈᓐ ᓈᑖ ᐊᓐ ᑳ ᐃᐦᑎᔮᓐ᙮ ᒥᒄ ᑳ ᐹᒋ ᒦᔨᒡ ᐱᔥᒡ ᐅᒑᒀᓂᒥᐙᐤᐦ ᐅᒌ ᐱᔥᒡ ᓂᐐᒑᐙᑭᓂᒡ ᒑ ᐳᔥᑎᔥᑭᒫᓐ᙮ ᐊᔮᐱᒡ ᐊᓂᑖ ᑳ ᐄᔑ ᒋᐦᒋᐱᔨᔮᐦᒡ ᐊᓂᑖ ᑳ ᒥᐦᒋᑖᐙᔮᒡ᙮ ᐋᑯᑖ ᐊᓂᑖ ᑳ ᐐᐦ ᐃᔅᐱᔨᔮᐦᒡ᙮ ᔖᔥ ᒌ ᐃᐦᑖᐅᒡ ᐊᓂᑖ ᐙᒥᔥᑎᑯᔒᐅᒡ ᔖᔥ, ᑳ ᒥᐦᒋᑖᐙᔮᒡ ᑳ ᐃᐦᑖᓂᐎᒡ᙮ ᐋᐅᒄ ᐊᓐ ᑖᐹᒋᒧᔥᑖᑖᓐ ᐊᓐ ᑳ ᐄᔑ ᑯᔥᑖᑎᑯᐦᒡ ᐊᓐ ᑳ ᐄᔑ ᐙᐱᐦᑎᒫᓐ ᑮᑆ ᓃᔨ᙮

ᐃᑣᔥᑎᒫᒑᓯᐤ ᐅᑎᔨᒧᐎᓐ: ᐊᓂᒌ ᐙᒥᔥᑎᑯᔒᐅᒡ ᑳ ᐃᐦᑖᒡ ᐊᓂᑖ ᑳ ᒥᐦᒋᑖᐙᔮᒡ, ᐋᐅᑯᓂᒡ ᐊᓂᒌ ᓂᑐᐱᔨᐅᒡ ᑳ ᐱᒥᐱᔨᐦᑖᒡ ᐊᔨᒧᐙᔮᐲᔨᐤ ᒫᒀᒡ 1950’s ᑳ ᐃᔅᐱᔨᒡ᙮ ᐋᑯᑦ ᑳ ᒌ ᐋᐱᒋᐦᐋᑭᓂᐎᒡᐦ ᒫᓐᐦ ᐄᔨᔨᐅᒡ ᑭᔮ ᐊᐱᔒᔥ ᑳ ᒌ ᐅᐦᒋ ᐅᔑᐦᑎᒫᓱᒡ ᔔᔮᓐᐦ᙮