ᐁᓪᓰ ᑕᕝ ᐋ ᒌ ᑎᐹᒋᒧᑦ, ᒋᓵᓰᐲ
ᐱᕌᔨᓐ ᐌᑉ ᐋ ᒌ ᐃᑣᔥᑎᒫᑎᐦᒃ ᑭᔮ ᑭᔮ ᐋ ᒌ ᒥᓯᓂᐦᐊᐦᒃ

ᐊᓂᑖ ᒫ ᐱᔮᒋ ᒋᔅᒋᔨᓐ ᐊᓂᑖ ᒀ ᐋ ᐱᐳᐦᒡ, ᒥᐦᑎᐙᒡ-ᐋ ᐋᔑᑯᒻ ᒌᔑᑳᐤᐦ ᔥᒌ ᐱᒋᓈᐙᐤ?

ᓂᔮᓂᑯᑐᓐᐦ ᑮᑆ᙮
ᐊᓂᑖ ᒀ ᐋ ᑎᒀᑭᐱᓈᓂᐎᒡ ᒀ, ᑖᒀᑭᐱᔮᐦᒡᐦ, ᐋᑯᑦ ᓂᒥ ᔖᒫᒡ ᓂᐅᐦᒋ ᐃᔮᔮᓐ᙮
ᐊᓂᑖ ᒫᒃ ᐋ ᐊᑎ ᐲᔥᒌᔑᑳᒡᐦ ᒫᒃ ᐊᓂᑖ, ᐊᓂᑖ ᒀ ᐋ ᐃᔥᒀᒥᑯᔖᒌᔑᑳᒡᐦ, ᑳ ᒌ ᐱᒋᒡ ᐊᐙᓂᒌ᙮
ᐋᑦ ᐋᑳ ᐱᒋᒡ ᐊᐙᓂᒌ, ᒥᒄ ᑳ ᒌ ᐃᔮᒡ, ᓂᔮᓂᑯᑐᓐᐦ ᒥᒄ ᐊᓐ ᓈᐹᐤ ᑳ ᒌ ᒸᔅᒑᐱᒋᑦ᙮
ᒸᔅᒑᐱᒋᓈᓂᐤ ᐃᓈᓂᐤ, ᐊᓂᑖ ᑮᑆ ᐊᔨᐦᒡ ᐊᓂᑖ ᐋ ᐊᑎ ᔮᐅᓈᑯᓯᔨᒡᐦ ᐊᒥᔅᒄᐦ ᑭᔮ ᒫᒃ ᑯᑎᒋᔨᐤ ᒑᒀᔨᐤ᙮
ᐋᐅᒄ ᐊᓐ ᐹᔨ­­­­ᒀᐤ ᑳ ᐃᐦᑎᔮᐦᒡ ᐊᓂᔮ ᓅᐦᑖᐐ ᒥᒄ ᓂᒌ ᐐᒑᐙᓈᓐ᙮ ᔅᑐᐎᕐᑦ ᒫᒃ᙮
ᔖᔥ ᒀ ᑳ ᐐᐐᔮᓐ ᒋᔅᑯᑎᒫᑑᑭᒥᑯᐦᒡ᙮
ᒀᔒᒥᐦᑦ ᐊᓂᔮ ᓅᐦᑖᐐ᙮ ᒌ ᑭᓄᐙᔨᒫᐤ ᐙᔥ ᓂᑳᐐ ᐊᐙᔑᔥᐦ, ᐊᓂᔮ ᑏᐱᑦ ᐊᓂᔮᐦ ᐅᑐᐙᔑᔒᒻᐦ᙮
ᒫᒀᒡ ᑳ ᐃᐦᑖᑦ ᐊᓂᔮ ᐃᓕᓐ ᐊᓂᑖ ᓂᑐᐦᑯᔨᓂᑭᒥᑯᐦᒡ᙮
ᐋᐅᔨᒋᒑ ᒫᒃ ᐙᐦᒋ ᐋᑳ ᐅᐦᒋ ᑭᒋᔥᒋᐱᒋᑦ ᐊᓂᔮ ᓂᑳᐐ᙮ ᐋᔥᒄ ᒌ ᐊᐱᔒᔑᔒᔨᐤᐦ᙮
ᑳ ᐃᔮᔮᐦᒡ, ᒸᔅᒑᐱᒋᑖᐤ, ᔨᐤ ᐊᓂᔮ ᓅᐦᑖᐐ᙮ ᓂᔮᓐ ᔅᑐᐎᕐᑦ ᐋ ᓃᔑᔮᐦᒡ ᑳ ᐐᒑᐅᒋᐦᑦ᙮
ᔖᔥ ᒀ ᒌ ᐐᔥᑖᒋᒑᓂᒌ ᓂᔮᑭᓐ ᐊᓂᔮᐦ ᐅᐎᓂᐦᐄᑭᓂᐙᐤᐦ᙮
ᒑᐦᒋᐱᒋᔮᐦᒡ ᑮᑆ᙮
ᒑᒃ ᑮᑆ ᐙᑎᐦᑎᒫᐦᒡ ᐊᓂᑦ ᒀ ᒑ ᐐᒋᔮᐦᒡ᙮
ᐋᐅᒄ ᒫᒃ ᐊᓐ ᑳ ᒌ ᐃᑖᔨᐦᑎᒫᓐ ᐊᓐ, ᐊᓂᔮ ᒀ,
ᐋᐅᔨᒋᒑ ᒀ ᐊᓐ ᐋ ᒌ ᐐᐦ ᒋᔅᑯᑎᒫᑯᐎᔮᐦᒡ ᑭᔮ ᒑᒀᓐ, ᐙᐦᒋ ᐃᑖᔨᐦᑎᒫᓐ, ᐊᓂᔮ ᐙᐦᒋ ᒌ ᐃᐦᑐᑖᑯᐎᔮᓐ ᒀ᙮
ᑖᐹ ᑮᑆ ᐋᔥᒄ ᓈᔥᑏᒡ ᓂᐅᐦᒋ ᐅᔮᔥ ᐃᐦᑎᓐ᙮
ᐋ ᐊᑎ ᐅᑎᐦᑎᒫᐦᒡ ᑮᑆ ᐊᓂᑦ ᒑ ᐐᒋᐙᐦᒋᐱᓈ᙮
ᐊᓂᔮ ᓅᐦᑖᐐ, ᒥᒄ ᓰᑎᐤ ᒫᑳᐃᐱᑦ᙮ ᐊᓂᑦ ᒀ ᐱᔮᓂᐦᐊᐦᒃ᙮ ᐎᔮᐱᐦᐅᐙᑦ ᐊᓂᔮᐦ ᑰᓐᐦ ᐊᓂᑦ ᒑ ᐐᒋᔮᐦᒡ᙮
ᒀᔑᑦ ᐆ, ᒋᑭ ᒌ ᐃᐦᑐᑖᓐ ᐋ ᒫᓄᒑᔨᓐ, ᓂᑎᒄ᙮
ᐄᐦᐄ, ᓂᑎᑖᐤ᙮
ᐙᐦᑎᒨᑦ ᑮᑆ᙮ ᐊᓂᔮ ᑳ ᒌᔑ ᒥᑳᐃᐱᑦ, ᒥᒄ ᓰᑎᐤ ᐹᓂᐙᔮᐦᑎᑭᐦᐄᒑᑦ᙮
ᐊᓂᐦᐄ ᐙᔥ ᐋ ᐊᑎ ᐱᓂᐙᔮᐦᑎᑭᐦᐄᒑᓂᐎᒡ, ᐋᐅᑯᓐᐦ ᐙᔥ ᐊᓂᐦᐄ ᐋ ᔮᐱᑎᒡᐦ ᐊᓂᐦᐄ ᒀ ᒥᔥᑎᒄᐦ, ᐋ ᐊᑎ ᐙᔅᑳᑳᐳᐎᐦᑖᑭᓂᐎᒡᐦ᙮
ᒫᐦᑦ ᑳ ᒌᓵᔅᑯᓂᐦᒃ ᐊᐙᓐ᙮
ᐋᔪᐎᒄ ᒫᒃ ᐊᓂᔮᔨᐤ, ᑳ ᒌ ᐃᐦᑐᑎᐦᒃ ᐊᓂᔮ, ᑏᐙᐦᒡ ᐊᑎ ᒫᒌᐅᒡ᙮
ᒋᑭ ᒌ ᐃᐦᑐᑖᓐ-ᐋ ᐋ ᐐᑳᐳᐎᐦᑖᔨᓐ, ᓂᑎᒄ᙮
ᑮᑆ, ᓂᑎᑖᐤ᙮ ᐋᐅᒄ ᒫᒃ ᑳ ᐃᐦᑎᔮᓐ ᐊᓐ, ᑳ ᒫᓄᒑᔮᓐ, ᑳ ᐹᔨᑯᐦᑭᒫᓐ᙮
ᓈᔥᒡ ᒀ ᐋ ᐊᑎ ᐅᑖᑯᔑᒡ ᐊᓂᑖ᙮ ᐎᓂᐦᐄᑭᓐᐦ ᒀ ᒌ ᓂᑐᐙᐱᐦᑎᒧᒋᒑᓂᒌ᙮
ᒌᔖᒡ ᐙᔥ ᒌ ᐐᔥᑖᓂᒋᒑᓂᒌ ᐊᓂᔮᐦ ᐅᐎᓂᐦᐄᑭᓂᐙᐤᐦ᙮
ᐋᐅᒄ ᒫᒃ ᐊᓐ ᑳ ᒌᔓᒑᔮᓐ, ᑳ ᐊᑎ ᓂᑯᐦᑖᔮᓐ, ᓂᐲ ᑭᔮ᙮ ᐋ ᐲᐦᒋᒑᔮᓐ ᑭᔮ᙮
ᔖᔥ ᓈᔥᒡ ᐊᑎ ᐅᑖᑯᔑᔨᐤ, ᔖᔥ ᐋ ᐊᑎ ᐊᐅᑳᔨᒡ, ᐄᔮᒄ ᐱᔮᑣᐙᔑᐦᒡ᙮ ᔖᔥ ᒀ ᑳ ᐲᐦᒋᒑᔮᓐ᙮
ᐱᔮᔓᐙᒡ ᒀ ᐊᒥᔅᒄᐦ᙮ ᑖᐹ ᓂᒋᔅᒑᔨᒫᐤ᙮
ᓈᓂᑑ ᓈᐤ ᐹᔓᐙᒋᒑᓂᒌ᙮ ᑳᒄᐦ ᒫᒃ ᐹᔓᐙᐅᒡ᙮
ᐋᐅᒄ ᒫᒃ ᐊᓐ, ᐋᑐᐐ ᑮᑆ ᓂᒥ ᒥᔥᑭᐎᒋᔨᐤᐦ ᐊᓂᔮᐦ, ᓈᓂᑑ ᐋᑐᐐ ᐹᔨᒄ ᓂᒥ ᒥᔥᑭᐎᒋᔨᐤᐦ᙮ ᐎᔥᒡ ᒀ ᐊᓂᔮᐦ ᒫᔥᑭᐎᒋᔨᒡᐦ᙮
ᑳ ᐱᐦᑯᓂᒃ ᐊᓐ ᐹᔨᒄ ᐊᒥᔅᒄ᙮
ᑳ ᒌ ᐃᐦᑎᒃ ᐙᔥ ᐊᓂᔮ ᓂᑳᐐ, ᔮᔨᑖ ᐙᔥ ᒥᓯᐙ ᒌ ᐐᐦ ᒥᔪᐦᑭᒽ ᒑᒀᔨᐤ ᐋ ᐃᔮᑭᓂᐎᔨᒡᐦ᙮
ᑭᔮ ᒫᒃ ᑳ ᒌ ᐃᐦᑎᓈᓂᐎᒡ ᐙᔥ, ᑳ ᒌᔑ ᓂᑯᐦᑖᒡᐦ ᐃᔅᒀᐤ, ᑳ ᒌᔑ ᓂᑯᐦᑖᓂᐎᒡᐦ ᒀ,
ᐋ ᐹᔓᐙᔨᒫᑦ ᐊᐙᓐ ᑳᒄᐦ, ᒨᔥ ᐙᔥ ᑳᒄ ᑳ ᓂᐱᐦᐋᑭᓂᐎᑦ᙮
ᒌᔖᒡ ᑳ ᒌ ᐋᔥᑯᐎᔥᑖᑦ ᐊᓂᔮᐦ ᐅᑳᑯᐦᑎᑯᒻᐦ᙮ ᒌᔖᒡ ᑳ ᒌ ᐲᑯᐦᐊᐦᒃ᙮ ᐋᐅᒄ ᐊᓐ ᑳ ᐃᐦᑎᔮᓐ᙮
ᐋᐅᒄ ᒫᒃ ᐊᓐ ᒨᔥ ᐋ ᒋᔅᒋᔮᓐ, ᓈᔥᒡ ᐋ ᒋᓯᓂᑎᐱᔅᑳᒡ᙮
ᒀᑎᒃ ᐆ ᔅᑐᐎᕐᑦ, ᒌᔖᒡ ᒫ ᓂᑭ ᐱᐦᑖᒀᓐ, ᓂᑎᑖᐤ᙮
ᔖᔥ ᐹᔨᑯᔖᑉ ᓈᓂᑑ ᐃᔅᐱᔨᒋᒑ, ᐙᐃᐐᔮᓐ᙮ ᐄᔮᒄ ᐹᐦᑖᒀᔮᓐ᙮
ᐋᔪᐦ ᐙᔥ ᓂᑎᐦᐄᐲᓈᓐ ᒌ ᒋᑭᒨ᙮
ᓈᔥᒡ ᒀ ᐋ ᒌ ᒥᔻᔨᐦᑎᒫᓐ ᐊᓐ ᑳ ᐊᑎ ᐃᐦᑎᔮᓐ᙮
ᓂᒌ ᐹᒋ ᐐᒋᐦᐄᑯᒋᒑ ᒀ ᔅᑐᐎᕐᑦ᙮
ᐋᐅᒄ ᒫᒃ ᐊᓐ, ᑖᐹ ᓂᒋᔅᒑᔨᐦᑖᓐ ᑖᓐ ᑎᐦᑐ ᒌᔑᑳᐤᐦ ᑳ ᐐᒋᔮᐦᒡ᙮
ᐹᔨᑯᑐᐎᔥᑖᐤᐦ ᐙᔥ ᓈᓂᑑ ᓂᒌ ᐃᐦᑖᓈᒋᒑ᙮ ᓈᔥᒡ ᐋ ᒌ ᓂᐱᐦᐋᒡ ᐊᒥᔅᒄᐦ᙮
ᑳ ᐱᒀᐦᐄᐹᔮᐦᒡ ᑭᔮ᙮
ᐊᓐ ᐙᔥ ᐋ ᐊᑎ ᐃᔥᒀᑯᒋᐦᒡ ᒋᔖᐲᓯᒽ, ᐋᐅᔨᒋᒑ ᐙᔥ ᐊᓐ ᑳ ᐃᐦᑎᔮᐦᒡ᙮
ᑖᐹᔅᒋᐤ ᒌ ᐃᐦᑎᑯᓂᔨᐤ ᐊᓂᔮ ᔅᑐᐎᕐᑦ ᐋ ᑎᐱᔥᑭᐦᒃ᙮ 29 ᐙᔥ ᑖᐱᔥᑭᐦᒃ, ᒋᔖᐲᓯᒽ 29᙮
ᐋᐅᒄ ᐊᓐ ᐋᔪᐦ ᑳ ᒌ ᓂᑐᐙᐱᒥᒃ ᓂᑎᐦᐄᐲᓈᓐ᙮ ᑳ ᒌ ᓈᑎᐦᐄᐹᔮᓐ ᒫᓐᐦ᙮
ᓈᔥᒡ ᐋ ᒌ ᒥᒥᐦᒌᐱᑖᔮᐦᒡ ᒫᓐᐦ, ᑭᔮ ᐊᓂᒌ ᒋᓄᔖᐅᒡ᙮ ᒥᓯᐙ ᑮᑆ ᐃᑎᒫᑯᒡ᙮
ᐹᔨᒀᐤ ᒫᒃ ᐊᓐ ᐋ ᐃᐦᑎᔮᓐ, ᐋᐅᒄ ᐊᓐ ᒀ ᐃᐦᑎᔮᓐ᙮ ᐋᔪᐎᒄ ᐊᓂᔮ ᑳ ᑎᐱᔥᑭᐦᒃ ᔅᑐᐎᕐᑦ᙮
ᓂᔮᑎᐦᐄᐹᔮᓐ᙮ ᓈᔥᒡ ᐋ ᒥᐦᒑᔅᑯᓯᑦ ᒋᓄᔖᐤ ᐹᑎᐦᐊᐦᒃ᙮
ᒀᑖᔨᐦᑎᒫᓐ ᐆ, ᒑᒀᔨᒋᒑ᙮ ᑳ ᒌ ᐱᐱᒥᓄᐎᑎᒀᐤ ᒀ ᒫᓐᐦ᙮
ᒀᑖᔨᐦᑎᒫᓐ, ᓂᑭ ᐱᒥᓄᐎᑖᐤ ᒫ ᐅᔮ ᒋᓄᔖᐅᔥᑎᒀᓂᔨᐤ᙮
ᑖᓂᔮ ᒫᒃ ᑖᑎᑳᒡ ᓂᐐᐦ ᐱᒥᓄᐎᑖᒋᒑ᙮
ᒑᒃ ᑮᑆ ᑖᑯᔑᐦᒡ ᐊᓂᔮ ᐋ ᐊᑎ ᑎᐱᔅᑳᔨᒡ, ᐋ ᐊᑎ ᐅᑖᑯᔑᔨᒡ᙮
ᑮᑆ ᒦᓐ ᐱᔮᑖᒡ ᒑᒀᔨᐤ᙮ ᒑᒀᔨᒋᒑ ᑮᑆ ᐋ ᐱᐹᑖᒡ᙮
ᒫᐃᒃ ᐊᓂᔮ ᒋᓄᔖᐅᔥᑎᒀᓂᔨᐤ᙮
ᒀᑎᒃ ᐆ, ᐦᐋᐲ ᐱᕐᐦᑌᐃ, ᓂᑎᑖᐤ᙮
ᐋᔪᐎᒄ ᐋᒄ ᐅᔮ ᑳ ᐋᔥᑑᒄ ᒋᓄᔖᐅᔥᑎᒀᓂᔨᐤ᙮
ᑳ ᒌ ᐃᑖᔨᐦᑎᒫᓐ, ᒑᒀᔨᒋᒑ ᐙᐦᒋ ᐋᑳ ᐊᓂᔮᐦ ᐅᐦᑯᐙᐤᐦ᙮ ᒥᒄ ᐊᓂᔮ ᒋᓄᔖᐅᔥᑎᒀᓂᔨᐤ᙮
ᐋᔪᐎᒄ ᒫᒃ ᐅᔮ ᑳ ᐹᒋ ᐋᔨᒧᑎᒨᑦ ᐅᔮ ᑳ ᑎᐱᔥᑭᐦᒃ᙮ ᑳ ᐃᐦᑎᑯᓂᔨᒡ ᐙᔥ 29 ᐊᓄᐦᒡ᙮
ᐱᔮᒋ ᒥᑣᐦᑎᑑᑦ ᐊᓂᔮ ᒋᔮᒋᔖᐹᔮᔨᒡ᙮ ᓈᑖ LG-2 ᐅᐦᒋ ᐹᒋ ᒥᑣᐦᑎᑖᐤ᙮
ᒀᔑᑦ ᐆ, ᔥᒋᔅᒋᓐ-ᐋ ᑖᐱᔥᑭᒫᓐ᙮
ᑮᑆ, ᓂᑎᑖᐤ᙮ ᐦᐋᐲ ᐱᕐᐦᑌᐃ, ᓂᑎᑖᐤ᙮
ᒀᔑᑦ ᐆ, ᒀᑎᒃ ᐆ ᒉᐃᓐ, ᓂᑭ ᒥᑣᐦᑎᐙᐤ ᒫ᙮ ᒀᔣᓐ ᓂᒥ ᓂᑭ ᐹᒋ ᐱᒥᓄᐎᑎᒄ ᒋᓄᔖᐅᔥᑎᒀᓂᔨᐤ᙮
ᐄᐦᐄ, ᐋᐅᒄ ᒫᒃ ᐊᓐ ᑳ ᒌ ᐃᐦᑎᔮᐦᒡ, ᑳ ᐃᐦᑎᓈᓂᐎᒡ ᒫᓐᐦ ᐊᓂᑖ᙮
ᐋᐅᒄ ᒫᒃ ᐊᓐ ᓈᔥᒡ ᐋ ᒌ ᒥᔻᔨᐦᑎᒫᓐ ᒫᓐᐦ ᐊᓐ ᑳ ᐃᔮᔮᐦᒡ, ᐊᓂᑦ ᒀ ᑳ ᐃᐦᑖᔮᐦᒡ᙮ ᐋᑦ ᒀ ᐋᑳ ᐅᐦᒋ ᐐᒑᐅᒋᐦᑦ ᓂᑳᐐ᙮
ᑭᔮ ᒫᒃ ᑳ ᒌ ᐃᐦᑎᓈᓂᐎᒡ ᐙᔥ, ᐃᔅᒀᐤ ᒀ ᑭᔮ ᒫᒃ ᐃᔥᒀᔑᔥ, ᑳ ᑭᒌᔑ ᐃᐦᑎᔮᓐᐦ ᐊᓂᑖ, ᑳ ᒌ ᒋᑐᐦᑖᔮᓐ ᒫᓐᐦ᙮
ᓃᔨ ᑭᔮ ᑳ ᒌ ᐱᐹᒧᐦᑖᔮᓐ ᐋ ᓈᓂᑐᐙᒀᔮᓐ᙮
ᑮᑆ ᑳ ᒥᔅᑭᐎᒄ ᑳᒄ ᑭᔮ ᒫᒃ ᐱᔮᐅᒡ᙮
ᐋᐅᒄ ᒫᒃ ᐊᓐ ᒑᔅᒋᔮᓐ ᒫᓐᐦ᙮ ᐊᓄᐦᒡ ᒫᒃ ᐋ ᐃᔥᐱᔑ ᐋᑳ ᒌ ᐃᐦᑎᔮᓐ᙮
ᐋᐅᒄ ᒫᒃ ᐊᓐ ᓈᔥᒡ ᐋ ᒌ ᒥᔻᔨᐦᑖᑯᐦᒡ ᐋ ᐃᐦᑎᓈᓂᐎᒡ᙮
ᒑᒃ ᒀ ᑳ ᒌᐙᐱᒋᔮᐦᒡ᙮ ᑖᐹ ᓂᒋᔅᒑᔨᐦᑖᓐ ᒫᒃ ᑎᐦᑐ ᑳ ᐹᔔᒋᐦᒡ ᐊᒥᔅᑯᒡ᙮
ᐱᔥᒡ ᒀ ᑳ ᐹᓱᒀᐤ ᐊᓂᒌ ᐊᒥᔅᑯᔮᓂᒡ, ᐊᓂᒌ ᒀ ᑳ ᓂᐱᐦᐋᑭᓂᐎᒡ᙮
ᐋᐅᒄ ᐊᓐ ᑳ ᐃᐦᑎᔮᓐ᙮